जेन–जी आन्दोलनको मौका छोपेर पश्चिम नवलपरासीका सरकारी कार्यालय र निजी सम्पत्ति तोडफोडमा संलग्नलाई कारबाही गर्न नवलपरासीका नेता तथा जनप्रतिनिधिहरुले ७ दिने अल्टिमेटम दिएका छन्।
पूर्वमन्त्री हृदयेश त्रिपाठी, लुम्बिनी प्रदेशका वन तथा वातावरण मन्त्री देवकरण कलवार र प्रतापपुर गाउँपालिकाका अध्यक्ष उमेशचन्द्र यादवले संयुक्त पत्रकार सम्मेलनमार्फत प्रमुख जिल्ला अधिकारीलाई उजुरी दिँदै घटनामा संलग्नलाई तत्काल कारबाही गर्न माग गरेका हुन्।
मन्त्री कलवारले आफ्नो घरभित्र पसेर लुटपाट गरी त्यसपछि आगजनी गरिएको भन्दै बर्दघाटबाट सुरु भएको घटनामा अपराधिक समूह सक्रिय रहेको दाबी गरे। उनले प्रशासनले कारबाही नगरे जनप्रतिनिधिहरुकै पहलमा कदम चालिने चेतावनी दिए।
पूर्वमन्त्री त्रिपाठीले यो घटना राजनीतिक आन्दोलन नभई शुद्ध अपराधीक गतिविधि भएको भन्दै तत्काल दोषीलाई पक्राउ गरी कारबाही गर्नुपर्नेमा जोड दिए।
उनले भने, “एक हप्ताभित्र कारबाही नभए जनतालाई हामीले रोक्न सक्दैनौँ, त्यसको जिम्मेवारी प्रशासनले लिनुपर्छ।”
प्रतापपुर गाउँपालिकाका अध्यक्ष यादवले घटनामा तस्करी र आपराधिक गतिविधिमा संलग्न व्यक्तिहरु संलग्न रहेको आरोप लगाउँदै प्रशासनले कानुनी कारबाही नगरे आफूहरु बाध्य हुने चेतावनी दिए।
उनले भने, “हामी घरबारविहीन भएका छौँ, व्यक्तिगत प्रतिशोध होइन, दोषीमाथि कानुनी कारबाही होस् भन्ने हाम्रो माग मात्र हो।”
जनप्रतिनिधिहरुले आन्दोलनमा ज्यान गुमाएका युवाप्रति दुःख प्रकट गर्दै आगामी दिनमा यस्ता अपराधिक समूहलाई संरक्षण नगर्न सबैलाई आह्वान गरेका छन्।